Glefsað og gelt en IP tala ekki vís

Það má heita athyglisvert að tveir helstu reyfarar sem nú eru í gangi tengjast Alþingi. Í fyrsta lagi mál nímenninganna svokölluðu, sem einhverrra hluta vegna voru svo ólánsamir að vera ákærðir að því er ætla má blásaklausir, ef marka má ákafar varnarraddir þeirra, þeir voru í fullum rétti að því er virðist að ryðjast inn á þingpalla í trássi við bann þar um og með hulin andlit, amk. sumir, að hætti múslíma og annarra spellvirkja. Mjög spennandi að fylgjast með því fjölmiðlum hver beit hvern, hvernig og hve fast. Sumir segjast meira að segja ekki hafa bitið heldur glefsað. Ætli þeir hafi ekki gelt um leið?

Í öðru lagi dularfull tölva sem fannst í fyrra og ekki er látið vita um fyrr en nú, sem tengd var til að ná gögnum úr tölvum þings og þingmanna, hakka þær, eins og kallað er. Ætli Lisbet Salander hafi nokkuð verið hér eða hennar hjálparlið? Og svo láta menn sér detta í hug að þeir sem átti að hafa herbergið til afnota, þar sem tölvan fannst veglaus, einmana og yfirgefin, hafi skilið hana eftir si svona á glámbekk! Er þjóðin orðin svo náttúrufirrt að vita ekki að refurinn bítur aldrei nálægt greninu. -- Engin auðkenni eru á tölvunni né í, ekki einu sinni IP tala að því er virðist. Helstu tæknifrík allra þeirra reyfara sem ég hef lesið upp á síðkastið ættu ekki að vera í vandræðum með að lesa nauðsynlegustu auðkenni tölvunnar með innrauðu ljósi eða öðrum merkilegum tækniaðferðum, þó þau kunni að hafa verið röspuð af svo ekki séu sýnileg berum augum.

Leggst nú lítið fyrir kappana í tæknideild löggunnar hér, ef þeir ráða ekki fram úr svona lítilræði!

Athugasemdir

[Anna Sigríður Guðmundsdóttir, 21.1.2011 kl. 11:56]

Ef sannleikurinn í Íslenskri pólitík kæmi allur uppá yfirborðið núna og það yrði öllum ljóst hvernig spillingin er hér, þá myndi steinlíða yfir flesta Íslendinga af sjokki. Og líklega myndu þeir lamast af hryllingi þegar þeir vöknuðu úr yfirliðinu!

 þessi tvö mál sem þú nefnir eru akkúrat dæmi um ógeðslega og svívirðilega græðgi og siðblindu háttsettra embættismanna hér á landi, sem misnota vald sitt. það verður að horfast í augu við staðreyndirnar ef á að leysa verkefnið í þessu fjölmiðla-svikara kúgunar-stjórnaða landi. það eru ekki Íslendingar sem stjórna fjölmiðlum á Íslandi, fyrir utan Útvarp Sögu og DV. Brennt barn ætti að kunna að varast eldinn. Erum við ekki nógu brennd? Eða eigum við að láta mafíuöflin klára okkur alveg upp til agna óáreitt? Er ekki nóg komið af siðblindu og ránum?

 M.b.kv.

[Sigurður Hreiðar, 21.1.2011 kl. 12:26]

Ja, nú varð ég heimaskítsmát, Anna Sigríður (norðlendingur, ekki satt?) Ég skil bara ekkert hvað þú ert að fara. Er þetta fólk sem ruddist inn á alþingi og vissi vel hvað það var að gera fórnarlömb gráðugra og siðblindra embættismanna?

Er þessi dularfulla tölva sem komið var fyrir með lævíslegum hætti þar sem hún fannst dæmi um fjölmiðla-svikara kúgunar-stjórn?

[Yngvi Högnason, 22.1.2011 kl. 10:30]

Það er aukaatriði Sigurður hvort þú skiljir eður ei.Það er ávallt gott að geta blásið, hvort sem það er gáfulegt eða ekki.

[Sigurður Hreiðar, 22.1.2011 kl. 11:40]

Takk fyrir blásturinn, Yngvi.

(Fyrirgefðu. Þetta lá bara svo vel við! Mér er sem ég heyri hann pápa þinn hneggja við góðlátlega.)