Bústaður?

Burtséð frá því hvað það er vitlaust að eggja óbilgjarnan -- í þessu tilfelli að elta smyglara með ljósagangi og látum í morgunumferðinni -- er það vitlaust að kunna ekki skil á helstu götunöfnum þeirra staða sem skrifað er um. Ragnar heitinn á Bústöðum bjó þar góðu búi og eftir bæ hans heitir gatan. Bústaðir hét hann en ekki Bústaður -- sem þurft hefði að vera til að gatan gæti heitið Bústaðarvegur eins og hún er kölluð í þessari frétt.

Áfengi fannst í bifreiðinni

Athugasemdir

[Börkur Hrólfsson, 28.9.2010 kl. 12:04]

Þetta er alveg hárrétt hjá þér. Hefurðu tekið eftir því hvað fjölmiðlafólk er farið að bæta r oft í staðarnöfn ?. Þetta er að verða eins algengt og þágufallssúkin, sem er öll að lifna við.

Landeyjarhöfn..... Skógarfoss.... Bústaðarvegur, og meira að segja verslun, sem er við Laugaveg, auglýsir á burðarpokum sínum ,,KÓS Laugarvegi" !!

Þau eru miklu fleiri dæmin, en þessi komu fyrst upp í kollinum á mér.

,,Mér" langar að vita, hvort ekki sé gerð krafa um málfræðikunnáttu, hjá fjölmiðlum !

[Sigurður Hreiðar, 28.9.2010 kl. 13:41]

Já, ég hef tekið eftir þessu -- og blöskrar!

[Ómar Valdimarsson (IP-tala skráð) 28.9.2010 kl. 15:13]

Rétt og takk fyrir að hnykkja á þessu. Ég rak augun í þetta í dag og var að því kominn að fara í vont skap enda er ég fæddur og uppalinn á Bústaðaveginum og man eftir bænum sem stóð sunnan við þar sem nú er Bústaðakirkja. En þá væri maður alltaf í vondu skapi því málvillurnar virðast nánast óteljandi og ambögurnar sömuleiðis. Nóg er það samt!