Ekkert „junk“

Einkennilegt er sú tilhneiging reyna að klína enskum framburði á orð eða heiti hluta og staða, á hvaða máli sem þeir eru. Ég hef áður nefnt dæmi um þetta út bílheimum, svo sem bíltegundinni Porsche sem er úr þýsku og borið fram porsé, en fínt mælandi Íslendingar hneigjast til að kalla þessa bíla upp á ensku Pors.

Dálítið skondið í útvarpinu áðan (Rás 1, auðvitað, það er besta rásin). Á föstudagsmorgnum er þar þáttur að norðan sem heitir Sagnaslóð, yfirleitt alltaf skemmtilegur og vel fluttur og það brást ekki fremur en endranær í morgun. Nema, þar brá fyrir tegundarheiti á þýskri herflugvél sem satt að segja varð talsvert fræg í heimsstyrjöldinni síðari og hefur verið það af sögum og sögnum síðan. Þessi vél heitir að sjálfsögðu „Júnkers“ upp á þýsku en ekki „dsjönkers“ eins og hún var kölluð í þættinum, enda ekkert „junk (dsjönk)“.

Athugasemdir

[Borghildur Anna Jónsdóttir (IP-tala skráð) 22.1.2010 kl. 13:25]

Þá sjaldan að þetta orð hefur farið um mínar varir ... vitsmunaheft þegar bílar eru annars vegar ... hefur framburðurinn Pors verið ráðandi. Ekki var um áhrif frá ensku að ræða heldur hélt ég í fávisku minni að þetta væri úr frönsku komið. Sýnu verra hljómar samt í mín eyru þegar enskumælandi kalla Peugeot  bílinn Porsjó í stað franska framburðarins sem þar ætti að vera allsráðandi.

[Sigurður Hreiðar, 22.1.2010 kl. 15:39]

Já, Borghildur Anna, Peugeot hefur orðið mörgum tungubrjótur gegnum tíðina. Oft hefur maður heyrt hann kallaðan Pegot eða Pígot eða eitthvað þess háttar. En hvaðan fá ensktalandi r- inn í orðið? Man satt að sega ekki eftir að hafa heyrt þessa tegund nefnda úr munni enskumælandi.

En það er sosum fleira úr þessari átt. Íslíngar hafa gjarnan átt það til að kalla Volkswagen „volsvagen“ með g-hljóði eins og í orðinu vegur. Hafa að engu að þýskir bera v fram eins og við berum fram f og g er venjulega hart í þeirra munni, eins og í upphafi orða hjá okkur, sbr. t.d. Gunnar, þannig að tegundin á að heita „Folksva-gen“.Gjarnan með norðlenskum framburði á fyrri hluta orðsins.

Takk annars fyrir innlitið!

[Jóhannes (IP-tala skráð) 22.1.2010 kl. 17:07]

Mér er það minnisstætt þegar Jóhannes Arason þulur las aftur og aftur tilkynningu rétt fyrir fréttir: Djörteit, djörteit, djörteit nýkomið. Náttúrulækningafélagsbúðin.