Lögmannsstofan Forir

Ég held að það eigi við að lyfta hattbarði fyrir þeirri lögmannsstofu sem hefur djörfung til að kalla stofu sína Forir.

For -- í fleirtölu forir -- hefur ýmsar merkingar, þeirra á meðal mjög votlend engi en að sama skapi grasgefin. Verður maður ekki að ætla að Forir lögmannsstofa hafi dregið nafn sitt af því? Ennfremur ber að taka ofan fyrir þeim sem fréttina skrifar að hann skuli fallbeygja hið rammíslenska nafn stofunnar.

Stoðir fá heimild til nauðasamninga

Athugasemdir

[Sæmundur Bjarnason, 6.4.2009 kl. 21:20]

Sammála. Annars grunar mig að lögmannsstofan sé ensk og heiti alls ekki Forir.

[Sigurður Hreiðar, 6.4.2009 kl. 21:44]

Ja þú segir nokkuð, Sæmundur. Mér datt ekki í hug að hún væri ensk með verkefni hér á landi. Og því síður að íslenskt fyrirtæki sem starfar á Íslandi prumpi upp með enskt nafn!

[Ruth Fjeldsted (IP-tala skráð) 17.4.2009 kl. 10:05]

Sæll vertu gamli vinur!

Minn skilningur á orðinu for er að það sé drullubleyta sem gjarnan myndast framan við hús eins og fjós/fjárhús eða aðra þá staði sem stórar skepnur hafast mikið við á með tilheyrandi traðki, einkum í bleytutíð. Þá minnist ég þess ekki að hafa heyrt það notað í fleirtölu fyrr - heldur bara forin - um forina o.s.frv.

Einnig þekki ég orðið  forað - foraðið sem ég tel að sé af sama meiði. ( Svo er það náttúrlega hlandforin góða!)

Eitthvað fer það aldrei vel í minn haus að ræða um kindur, kýr og hesta sem dýr. Auðvitað veit ég vel að þau eru dýr, þ.e.a.s. þau eru í "dýraríkinu". En í mínum huga eru þau skepnur.  Kann t.d. ekki við að reka  dýrin í fjósið/hagann  ;)

Kveðja í bæinn.

[Sigurður Hreiðar, 17.4.2009 kl. 12:59]

Þakka fyrir þetta, Ruth. -- Þekkirðu ekki tam. örnefnið Ölfusforir?

Kv. í bæinn

[Ruth Fjeldsted (IP-tala skráð) 17.4.2009 kl. 15:33]

Reyndar ekki - minnist þess ekki að hafa heyrt það. Er það þá eitthvert blautlendi í Ölfusinu?